السيسي: تجهيز 500 ألف فدان للزراعة فى سيناء بتكلفة 160 مليار جنيه… ومشروع الدلتا الجديدة أكبر
أجرى الرئيس عبد الفتاح السيسي مداخلة تعقيبًا على حديث اللواء إيهاب الفار، رئيس الهيئة الهندسية للقوات المسلحة، بشأن مشروعات الري التي تنفذها القوات المسلحة في سيناء، خلال حضوره افتتاح محطة معالجة مياه بحر البقر، اليوم الاثنين. وقال السيسي بدايةً: “اسمحلي يا إيهاب اتدخل عشان الصورة تبقى واضحة مش ليا، حتى للناس الى بتسمعك بس انا عايز أقول في الجزء اللى هو الأخير ده، اللى هو اللواء إيهاب لما قال 160 مليار، هو كان يقصد يقول ايه، اللى هو احنا هنعالج المياه ليه؟ هنعالج المية عشان نستخدمها، وعشان نستخدمها المية الى هتقدر تطلع من المعالجة دي تكفي اللى هو زي ما قال وزير الري وزير الزراعة 500 مليار فدان، وخليني أقول الرقم ممكن الناس تحفظه، يعني مش هتقيد كتير بالـ 467 ألفا، هقول 500”.
وأضاف: “طيب يمكن كتير من اللى بيسمعونا يقولك 500 ألف فدان عشان توصل أنك أنت تزرعهم تصرف 160 مليار مش كده، صحيح رقم كبير قوي، بس عايز اقولكم عرفتوا ليه احنا بنتألم لما بنلاقي في تعدي عالاراضي الزراعية؟ لما يكون انت النهادرة تتعدوا في خلال 10 سنين على 700 ألف فدان”.
وتابع السيسي: “ده احنا عشان نعمل نص مليون فدان جداد داخلين في 160 مليار جنيه، انا بقول كده عشان تبقى الأمور واضحة طب هو واللواء إيهاب لما ييجي يتكلم في تفاصيل المشروع ده كله، الجزء الاولاني هيبقى مشروح وواضح، وحتى الجزء التاني، لازم تعرفوا إن انا عشان أوصل للـ 500 الف فدان دول عايز شبكة طرق، وعايز شبكة ري، وعايز شبكة كهرباء، وعايز نظم ري حديثة، وعايز انشاءات للناس الى هتعيش عالكلام ده، والكلام ده عشان يتعمل يتكلف بمبالغ كتير، ليه بقى، انتوا منغير ما اجيب أسماء دول مش كنتوا تسمعوا يقولك ايه دولة فيها 50 مليون فدان طب ما اترزعتش ليه؟ فيها 100 مليون فدان طب ما اتزرعتش ليه عشان زراعة الأرض المليون فدان ممكن تدخل في 200 مليار جنيه، عشان تعملها صح، عشان تشق ترع ليها، وتشق طرق ليها ومدقات، وتعملها مصارف وتعملها شبكة كهرباء عشان المكن والمعدات الري الحديثة الى بتستخدم تستخدم هتتكلف كتير، بيقى باردو ليه حق ولينا حق إن الترعة الى اتعملت من ميت سنة إن ربنا هو الى عاملها حرام علينا نهدرها ولا لأ”.
وأردف السيسي: “الفكرة هنا انا مش بتدخل في تفاصيل لمشروع يا إيهاب انا عايز أوصل رسالة للناس ان احنا عشان نصلح او نزرع نص مليون فدان في سيناء داخلين في 150- 160 مليار جنيه، عشان بس نقول ايه نبدأ نزرع بقي، يبقى انا لو عندي قدرات زراعة أهدرها؟ يبقى احنا كلنا كمواطنين كدولة نسمح ان احنا نضيع شقانا ونضيع مستقبل حاضرنا ومستقبل أولادنا بالتعدي ده احنا عشان نعمل النص مليون فدان دول داخلين في 150/ 160 مليار جنيه، وداخلين في إجراءات كتيرة جدا، الموضوع مش إرادة سياسية بس، الأموال دي احنا بنبذل جهد وبنتكلف يعني احنا خدنا، من مبقولش سر، احنا خدنا قروض من الصناديق العربية عشان نعمل الكلام ده يا أستاذ مصطفى، فلازم الناس باردوا تعرف ده، الأموال دي، دي قروض من الصناديق العربية بفايدة ميسرة لمدة سداد على باردوا مريحة يعني، فانتم يا مصريين احنا كلنا مع بعض في قارب واحد، عشان نعمل 500 الف فدان، احنا بنتكلم في 150 مليار جنيه، المناسبة ال150 مليار جنيه احنا مش بنجيتهم من جيبنا احنا بنستلفهم عشان نعمل .. يبقى لو عندي حاجة تانية موجودة عند في الايد اضيعها”.
وفي مداخلة ثانية على حديث اللواء إيهاب الفار، توقف الرئيس السيسي عند أحد الصور المعروضة على شاشة الافتتاح، وقال: “أنا بس عايز أوضح للناس اللي بتتفرج علينا هنا، لما بنقول أن أنت عايز تنقل المياه دي أكتر من 100 كيلو، شوف العمل الهندسي والمنشآت والمواد اللي داخلة في نقل المياه دي عشان توصل للأماكن اللي هيتم زراعتها، اللي أنا بقول عليها شبكة نقل المياه، أو شبكة الرأي، إن شئتوا أن أنتوا تسموها كدة، بصوا حضراتكم عشان يعمل الكلام دة بيتعمل ما يقرب، زي نفق بشكل أو بآخر، ترعة تانية بتتحط فيها المواسير بالشكل ما انتوا شايفينها ده، وبعدين تتأمن كويس أوي، وبعدين تتردم، وبعد كدة المياه توصل”.
وأضاف: “أنتوا عرفتوا ليه الإرهاب في سيناء؟ عرفتوا ليه؟ عشان دة ميتعملش، عشان تفضل كدة، الحرب حربين، حرب ضد الإرهاب، وحرب البناء، أنا جبت الصورة دي عشان دول 8 مواسير، بعد كدة بيبقوا 3 أو 2 حسب حركة الأرض، كل دة تكلفة بالمليارات عشان في الآخر نقدر نقول إن سيناء فيها تنمية حقيقية”.
وتابع السيسي: “طيب وأنا بقول لكوا الكلام دة القوات المسلحة مسؤولة عن تأمين الأعمال ديـ عشان الإرهابيين مش عايزين، مش كدة يا إيهاب؟ أنا بقول الكلام دة للناس عشان دة يتعمل.. طيب أحنا بنعمل المحطة الجديدة بتاعة الحمام، بنحط فيها قوات لتأمينها؟ لا.. ليه؟ لأن مفيش خطر، سيناء أة كل خطوة بنعملها محتاجة تأمين، لان هو الصراع ما بين الإرهابين والأشرار وبين التنمية في سيناء، ففي قوات بتأمن حركة العمل دة لغاية ما تخلص، ويمكن حتى بنبقى محتاجين بعد كدة”.
وأردف موجهًا الكلام للواء أيهاب الفار: “أنت قولت 36 شهر، هو أنت هتعمل محطة الحمام في أد أية؟ أنا عارف 26 يا أيهاب، محطة الحمام أحنا اتفقنا أمتي؟”. وهو ما أجاب عليه اللواء أيهاب الفار: “إن شاء الله يا فندم في شهر 6 عام 2022”. واستكمل السيسي: “طيب أنا بقول للمصريين اللي بيتعمل في الدلتا الجديدة أكبر من المشروع دة، لان أحنا بنستهدف 7 مليون متر، وبردوه ننقلهم بالطريقة دي وبترع مكشوفة كمان، عشان نزرع المستهدف المليون أو الـ 2 مليون فدان اللي في الدلتا.. دة أحنا لازم نشكر ربنا أوي والله، نشكر ربنا أو يأنه أعاننا وبيساعدنا أننا نعمل كدة”.
