السيسي: نسابق الزمن لتطوير وتحديث واستعادة كفاءة منشأتنا المائية ولن نسمح بالتعديات عليها
أجرى الرئيس عبد الفتاح السيسي مداخلة، تعقيبًا على كلمة الدكتور محمد عبد العاطي، وزير الموارد المائية والري، خلال حضوره افتتاح محطة معالجة مياه بحر البقر، اليوم الاثنين، حيث بدأها السيسي بقول: “أنا بس يمكن هعلق على الكلام اللي قاله دكتور محمد فيما يخص التعدي على الجسور والمجاري المائية والمنشآت المائية، وزي ما أحنا شايفين أحنا كدولة بنحاول نسابق الزمن لتطوير وتحديث واستعادة كفاءة منشأتنا المائية بالكامل، يعني كان النهاردة الصور اللي انتوا شوفتوها دي الخاصة بشكل الترع وحالها، دا كان يؤثر على حال الناس، يعني كان بيخلي الناس مش قادرة تستفيد بالمياه، وبيخلي الزراعات بتاعتها بتتأثر، وكلام من هذا القبيل، إذا الدولة بتقوم بدور وكمان المواطنين عليهم دور والتزام”.
وأضاف السيسي: “الدولة تقوم بدور اية… أحنا فعلا انا عايز أقولكوا على حاجو.. لو انتوا النهاردة كحكومة راجعتوا الإجراءات اللي اتعملت خلال السبع سنين يا دكتور مصطفى، في كافة القطاعات والمجالات، وقولتوا أن دا كان تطوير محتمل لغاية 2052، أنا أتصور أن أحنا قطعنا طبقا للمعدلات اللي تم تنفيذها خلال المدة دي، المفروض أن الكلام دا يتعمل في الـ 20 و30 سنة اللي جايين، حاجات كتير منها، لكن أحنا قولنا إننا كنا متأخرين كتير وبالتالي لابد أن أحنا نتحرك بمعدلات أعمق وأسرع بكتير حتى لو كان التخطيط كان ممكن يمتد لغاية 2052، وبالتالي أنتوا كمان يا مصريين محتاجين تساعدونا”.
وتابع: “أنا بتكلم مش بقولك على منشآت…. أنت اتعديت على خاصة حكومية، منشآت خاصة بالناس، لما تيجي تقول النهاردة حاجة زي رشيد، كنا بنتكلم في 80 مليون مياه بتعدي تبقى 30 مليون، طيب ما دا هيبقى ليها تأثير على حجم المياه اللي واصل للناس اللي بتزرع على الرافد دا أو على الفرع دة، ونفس الكلام لدمياط، إذا فكرة أن أحنا كمواطنين نتعدى على دة، وكحكومة تسكت على دة، دة أمر مش ممكن أن أحنا نقبله، وبالتالي النهاردة كل التعدي على المنشآت الخاصة بالحسور والترع أو منشآت الري، لا لا لا، دة وزارة الداخلية مع المحافظة، مع القوات المسلحة لو محتاجين، لازم خلال 6 شهور أخذ تمام أنه اتشال، أحنا مش هنتحايل على حد، وهو حد يغتصب أرض الدولة ونقول عشان خاطر أصل مصلحتهم، أصل حياتهم مهددة بالخطر، هو أنت تأخذ أرض الدولة وأتحايل عليك؟”.
وأردف: “وزارة الداخلة ولو الأمر تطلب القوات المسلحة، كل التعديات اللي اتعلمت خلال الـ 20 أو 30 سنة اللي فاتوا يتشالوا وأخذ التمام خلال 6 شهور، زي ما أنا بعمل تبطين للترع، وبعمل إجراءات فوق الخيال، فوق الخيال وأنا عارف أنا بقول أية، اللي بيتعمل في مصر دة فوق الخيال، يبقى أنا كمان مش هقبل أن حد يتعدى على قدراتنا وعلى اللي أحنا بنعمله عشان نحسن أحوال الناس”.
واستكمل: “المحافظ اللي موجود، سواء كان تعدي على أراضي زراعية أو تعدي على منشآت جسور، وكلام من هذا القبيل، لا دة كلام مش بقول دلوقتي، كان ممكن يبقى مقبول قبل كدة، لكن لدوقتي يا جماعة مش مقبول، حد يقول أنت زعلان؟ أقولك لا أنا خايف عليكوا، بقولك انهاردة كان هنا بيعدي 80 مليون متر مياه بيكفوا الناس تروي بشكل كويس، بما يبقى 30 مليون يبقى معناه أية، ليه عشان أية بنعمل كدة في نفسنا؟ عشان مفيش حد سواء….، وبردو متزعلش يا دكتور محمد بقي ما انتوا كنتوا قاعدين بتعملوا اية السنين اللي فاتت، مش كدة ولاأية يا دكتور مصطفى، مش اللي بيتابع الكلام دة هو وزارة الري ولا أية؟ بالإضافة للمحافظة ومدير الأمن اللي موجود ولا أية؟ لا لا.. 6 شهور والقى الجسور دي متظبطة زي الكتاب ما بيقول، عن تطلب الأمر نزول الجيش ينزل الجيش يا محمد، ينزل يشيل الكلام دة، وتتحط المعدات ألف معدة أو 3 آلاف معدة أو 10 آلاف معدة، كل الجسور دي ترجع تاني زي ما كانت، وكل التعديات دي تتعمل، وكل بيانات الناس دي تبقى موجودة معانا، تبقى موجودة معانا، سواء كان تعدي على أراضي زراعية أو تعدي على الجسور”.
وأضاف السيسي: “وبالمناسبة بقي أن بقول لكم، هيبقى من ضمن الإجراءات اللي بعملها حتى استعادة أو انهاء التعدي، وقف كل الدعم اللي بتقدمه الحكومة من خبز وتموين وأي حاجة تانية لأي حد يخالف، أنا بقول لها لكوا، ولكل المصريين، اللي هيتعدى ويعمل إجراء مش مضبوط على أراضي زراعية أو على ترع ومصارف، يقف الدعم اللي بيتقدمله من جانب الحكومة، لغاية التعدي دة ينتهي تمامًا، زي ما أحنا حاطين 700 مليار جنية عشان نخلي حياة كريمة للناس، والدولة بتجري بمنتهي القوة عشان تسعد الناس كلها هيبقى مش مقبول أنوا يطلع حد من عندنا يتعدى ويتجاوز… 6 شهور يا دكتور مصطفى وهأخذ شهر بشهر الإجراءات اللي اتعملت”.
